2025 оны 12 дугаар сарын 24-ний өдөр  МХТС-ийн Захирал Л.Баяр-Эрдэнэ болон “Оллоо” ХК-ийн Гүйцэтгэх захирал Г.Уламбаяр нар хамтран ажиллах санамж бичигт албан ёсоор гарын үсэг зурлаа. Энэхүү санамж бичгийн зорилго нь мэдээлэл, харилцаа холбоо, хиймэл оюун, роботын технологийн чиглэлээр сургалт, судалгаа, инновацыг хөгжүүлэх, оюутнуудын практик ур чадварыг нэмэгдүүлэх юм.

Санамж бичгийн хүрээнд “Оллоо” ХК болон МХТС дараах чиглэлээр хамтран ажиллахаар тохиролцов.

 - Оюутны практик ур чадварыг хөгжүүлэх зорилгоор туршилт, судалгаанд ашиглах хиймэл оюунд суурилсан ухаалаг хяналтын систем бүхий сургалтын нэг ангийг хамтран тохижуулах

- Хиймэл оюун ухаан болон хэл ярианы сургалтын системийг турших зорилгоор сургалтын зориулалттай “Багш робот”-ыг хөгжүүлж, хэрэглээнд нэвтрүүлэх

- Мал аж ахуйн салбарт хиймэл оюун ухаан, роботын технологийн хэрэглээний судалгаа хийж, Монгол Улсын орчин нөхцөлд тохирсон туршилт, инновацын шийдэл боловсруулан “Малчин робот”-ыг хөгжүүлж, хэрэглээнд нэвтрүүлэх

- БНХАУ-ын Шанхай болон Ухань хотын их сургуулиудтай хамтын ажиллагааг зохион байгуулж, судлаач багш, төгсөх курсийн оюутнуудын мэргэжил дээшлүүлэх үйл ажиллагаанд дэмжлэг үзүүлэх, сургалтын төлбөрийн хөнгөлөлт, тэтгэлэг, хамтарсан хөтөлбөр хэрэгжүүлэхэд хувь нэмэр оруулахТалуудын энэхүү хамтын ажиллагаа нь оюутан, судлаачдыг орчин үеийн дэвшилтэт технологид суурилсан мэдлэг, дадлагаар хангах, бодит хэрэглээнд чиглэсэн инновац, гарааны төслүүдийг дэмжихэд чухал ач холбогдолтой юм.

Энэхүү хамтын ажиллагаа нь талуудын харилцан ашиг сонирхолд нийцсэн төдийгүй Монгол Улсын шинжлэх ухаан, технологийн салбарын хөгжил, олон улсын өрсөлдөх чадварыг нэмэгдүүлэхэд бодит үр нөлөө үзүүлнэ гэдэгт итгэлтэй байна.

МХТС-ийн Захиргаа, Электроникийн тэнхим