Түүхэн хөгжлийн 50 гаруй жилийг туулж 2009 оноос “Мэдээлэл Холбооны Технологийн Сургууль” болон үйл ажиллагаагаа явуулж буй манай сургуулийн цахим хуудсанд морилж буй эрхэм таны амрыг эрэн мэндчилье.

Өнөөдөр бид дэлхийн аж үйлдвэрийн  дөрөвдүгээр хувьсгалын эрин үед ажиллаж, амьдарч байгаа билээ. Эрдэмтэн багш нар маань судалгаа шинжилгээ, бүтээл туурвил хийх, сурган хүмүүжүүлэх, соён гэгээрүүлэх их үйлсдээ шамдаж, оюутан суралцагчид маань эрдмийн их  уурхайгаас оюуны баялаг хуримтлуулахаар хичээн суралцаж байна.

Бид эрдэмд суралцаж, мэдлэг хуримтлуулан, түүнийгээ хөдөлмөрийн зах зээлд хэрэглээ болгох чадвартай, мэргэжилдээ сонирхолтой, судалгааны арга барил эзэмшсэн бүтээлч мэргэжилтэн бэлтгэн гаргах зорилт тавин ажилладаг.

Энэхүү зорилтыг хэрэгжүүлэхийн төлөө эрдэмтэн багш, ажилтнууд болон бакалавр, магистр, докторын түвшний нийт суралцагч та бүхэн санаачил, сэтгэ, бүтээ, туурви. Бид та бүгдийн санаачлагыг дэмжин, ажил амьдралд нэвтрүүлэх өргөн боломжийг нээхийн төлөө ажиллах болно.

Монгол улс, дэлхийн хөгжилд үнэтэй хувь нэмэр оруулах инженерүүдыг төрүүлэх үйлсэд хамтран зүтгэцгээе.

ШУТИС-ийн Мэдээлэл, холбооны технологийн сургуулийн захирал

Доктор (Ph.D), дэд профессор Н.ЧУЛУУНБАНДИ